أغنية "يا بلادي" الأصلية: مدرسة بحر البقر الإبتدائية
محافظة الشرقية
ومدرستي مدرستي
بحر البقر الإبتدائية
كراستي كراستي
مكتوب عليها تاريخ اليوم
مكتوب على الكراس إسمي
سايل عليه عرقي و دمي
من الجراح اللي في جسمي و من شفايف بتنادي
يا بلادي يا بلادي أنا بحبك يا بلادي
يا بلادي يا بلادي أنا بحبك يا بلادي
صلاح جاهين «أغنية الدرس انتهى» غناء شادية:
الدرس انتهى لِمُّوا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزي
دى لطفـلة مصرية وسمرا
كانت من أشـطر تلاميذي
دمها راسم زهرة
راسم رايـة ثورة
راسم وجه مؤامرة
راسم خلق جبارة
راسم نـار
راسم عار
ع الصهيونية والاستعمار
والدنيا اللي عليهم صابرة
وساكتة على فعل الأباليس
الدرس انتـهى
لموا الكراريس..
إيه رأي رجـال الفكر الحر
فى الفكرادي المنقوشة بالدم
من طفل فقير مولود في المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
في جناين الإصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس...
إيه رأيك يا شعب يا عربي
إيه رأيك يا شعب الأحـرار
دم الأطـفال جايلك يحـبي
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
في دنيا فيها النور بقى طيف
وساكتة على فعل الأباليـس
الدرس انتهى لموا الكراريس
ليست هناك تعليقات:
إرسال تعليق